- Primært ønskjer Norsk Lokalradioforbund innføring av likebehandlingsprinsipp som innebér at ordninga med pressestøtte vert mediestøtte og omfattar fleire plattformer enn aviser. Føresetnadene for å få slik driftsstøtte bør vera om lag dei same som er lagt til grunn for ordninga slik ho er i dag, skriv NLR i si uttaling til Mediestøtteutvalet.

I dag vert det gitt om lag 285 millionar kroner i ulike former for driftsstøtte til avisene. For å realisera ei ny plattformnøytral ordning, er det nødvendig å auka den totale økonomiske ramma dersom ikkje eksisterande mottakarar av pressestøtte skal få ein kraftig inntektsreduksjon.

Sekundært kan den økonomiske ramma vera som i dag, men ha ei ny og utvida innretning basert på ei plattformnøytral ordning. Dette innebér at dei avisene som får støtte i dag, vil få redusert sine tilskot.

Uavhengig av dette føreslår vi at dei økonomiske rammene for tilskot til programstøtte, kompetansehevande tiltak og utviklingsprosjekt til lokal-tv og lokalradio vert utvida kraftig i forhold til i dag. I tillegg føreslår vi at reglane for å få tilskot vert endra og i større grad får preg av å vera driftsstøtte enn tilfellet er i dag.

NLR føreslår også at ikkje-kommersielle lokalradiostasjonar kjem inn under «Ny ordning for momskompensasjon for frivilligheten». I samband med statsbudsjettet for 2010 er denne ordninga innført, og når det ikkje er krav om momspliktig omsetnad, vil ordninga kunne tilpassast ikkje-kommersielle lokalradiostasjonar, inklusive dei stasjonane som har bingoinntekter. Ei ordning med fullt frådrag for inngåande meirverdiavgift vil ikkje medføra vesentleg tapte inntekter for staten, men for dei aktuelle stasjonane vil ei slik omlegging vera eit viktig og positivt bidrag.

- Norsk Lokalradioforbund deltar ved seinare høve gjerne i tenkninga om korleis omleggjing av ordninga og regelverket kan realiserast. I denne omgang har vi signalisert ei meir overordna tilnærming av korleis rammevilkåra for mediene skal vera i framtida, skriv dei i høyringa.

Du kan lese alle høyringar her.